As actividades inclúen os tradicionais campamentos urbanos e de tempo libre, obradoiros culturais e artísticos, cursos de piragüismo, observación astronómica e rutas en kaiak, robótica ou informática e programación.
O concelleiro de Xuventude, Alberto Oubiña, lembra que este é un ciclo de actividades diverso e inclusivo, que pon en valor valores positivos como a socialización, o encontro e o respecto.
No Local de música acollemos varias actividades:
OBRADOIRO MUSICAL “A FABRICA DE SINGLES”
Factoría musical de creación e lanzamento de artistas musicais, ao puro estilo dun “Motown” revisitado do s. XXI, incluíndo as redes sociais e co protagonismo dos videoclips ao estilo MTV.
IDADES: 10-14 anos (nacemento 2008-2012)
DATAS: 1 ª quenda: 4-8 xullo e 2ª quenda: 12-18 xullo HORARIO: 1 0.00-14.00
LUGAR: Local de Música
IMPARTE: Estudo Bonobo
OBRADOIRO “TEATREIRXS: MONTA A TÚA PROPIA COMPAÑÍA DE TEATRO”
Interpretar, crear, xogar, improvisar, imaxinar e expresar dende o teatro.
IDADES: 8-12 anos (nacemento 2010-2014}
DATAS. 1-5 agosto
HORARIO: 09.30-13.30
LUGAR: Local de Música e espazos ao aire libre da cidade
IMPARTE: Leucoíña Pasea
O concelleiro de Xuventude, Alberto Oubiña, acaba de presentar o programa íntegro de Ponteverán, unha completa proposta á hora de ofertar cultura e ocio educativo para a mocidade pontevedresa que terá este estío a oportunidade de realizar actividades diversas, entre campamentos, obradoiros culturais e artísticos, natureza deportes e aire libre; e obradoiros de tecnoloxía e informática; as catro ramas nas que está dividido o programa.
Ponteverán 2022 recupera o brillo anterior a pandemia, que afectou directamente á súa celebración e, se ben puido ser programada algunha actividade, a sombra da Covid-19 era moi alongada, permitindo só pequenos encontros moi reducidos e limitados. Semella que eses tempos quedaron atrás, e o programa de actividades para este estío aumenta nun 80% as súas prazas —respecto do 2021— e o seu orzamento nun 62%, até chegar aos 45.139 euros.
Cómpre lembrar que todas as actividades, agás o campamento de tempo libre ‘Equal’, serán de balde, e só requirirán de inscrición a través da web oficial do Concello de Pontevedra, a partir do 8 de xuño, https://apuntate.pontevedra.gal/.
Os rapaces e rapazas do municipio de Pontevedra contarán con preferencia á hora da adxudicación das prazas. No caso de que queden ocos libres, optarán a estes persoas doutros concellos, tendo preferencia os concellos limítrofes. Unha vez esgotado o número máximo de solicitudes por actividade, o formulario será pechado e avisarase ás persoas admitidas para que formalicen a inscrición coa achega da documentación necesaria.
É posíbel consultar e solicitar máis información na Oficina Municipal de Xuventude do Concello de Pontevedra, con cita previa, de luns a venres, de 9 a 14 horas.
